كيف تعاقبي اولادك بصورة صحيحة بدون ضرب
🏡 كيف تعاقبي اولادك بصورة صحيحة بدون ضرب ؟!
مهما كان عمر طفلج راح تلكين العقاب المناسب لعمره... .
🌃 اكو ناس يدورون حلول سحرية في التربية! وهم بالاصل مربين اطفالهم باسلوب كله ضرب وإهانة وبهدلة، فطبيعيا راح يكون لطفلك رد فعل لاسلوبك.
حتى تربين ابنج صح وباسلوب صح وبدون ضرب لازم تصبرين حتى تشوفين النتائج مع تغيير اسلوبج.
تربية الأبناء محتاجة صبر ثم صبر ثم صبر
1️⃣- طفلج من عمر تسع اشهر لحد سنة ونص :
يبدي يعرف كل شغلة، وتلاحظين لمن تشوفينه يسوي شي غلط وانتي ترفعين صوتج عليه وبشكل حاد شوية. ثاني مرة اذا راد يسوي هالشي راح يباوعلج ويعرف انتي راح ترفعين صوتج.. وبهاي اللحظة راح يربط بين الغلطة ورد فعلج.
⛔ هو بهل عرف فهم الصح من الغلط بس لحد الان ماعرف ليش انضرب... ف يكون احسن عقاب لاخطاء الرضع بهل عمر هو النبرة الحاسمة وقت الخطأ واهم شغلة ان تكون قريب منه حتى يعرف الكلام موجه اله.
2️⃣- طفلج عمره سنة ونص لحد سنتين ونص وأخطأ:
اكو اسلوب اخر غير بنرة الصوت،، هو ان تخلينه يمج بالغرفة وتسكتين لدقايق ماتحجين ويا ،ولا تباوعين عليه، لحدما يبدا يبجي وراح تشوفينه يذب روحه بحضنج وهو يدري انه سوة شي غلط وعلمود هالغلط تعاقب.
⛔ هذا النوع من العقاب ينفع للطفل الي يبجي هواية بدون سبب او تكوليله اسكت ومايسكت، طبعا لازم تنتبهين انو الطفل مو مريض وماكل وشارب ومغيرة ملابسه وشبعان نوم، يعني ماكو سبب للبكاء
⛔ وكوني واثقة انو هاي اهم مراحل الحياة، انو لازم يعرف الصح من الخطا، وتكونين رقيبة على كل تصرفاته،، راح يخليلج الف حساب بتقدمه بالعمر وراح ترتاحين منه ومايصير عناد ولا يسوي صوت عالي ولا يبجي ولا يسوي شي يخليج تحسين انو انتي فشلتي بتربيته.
⛔ ممنوع منعا باتا انو تعلمون الطفل يكول تف على عمه او خاله او غيرهم او اضرب جدو او اكفش خالتك او او او من هالتصرفات الي تخلي الطفل يتجرا على الكبار ويعتبر هالتصرفات شي سهل
3️⃣- طفلج عمره من ثلاث سنوات ل 10 سنوات :
🐯_ يعيط ويرمي نفسه بالكاع لان طالب منج طلب معين. باوعي بعينه وكوليله ( تدري اني جنت اريد اجيبلك او اعطيك هالشي بس لان انت تبجي خليتني مانطيك، واذا مابطلت بجي وماطلبت بادب مستحيل اعطيك هالشي)
⛔ لاتكولين اكثر من هالشي، وديري بالج تتراجعين عن كلامج، حتى لو تحول ابنكم لملاك بجناحين هههههههه
لان مرة على مرة راح يرجع مثل قبل.
⛔ واذا حاول يمد ايده عليج،، الزمي ايده بقوة وقوليلة عيب تضرب ماما بنبرة شديده ووخري ايده عنج.
⛔ ورا مايهدا ويبطل نوبة الغضب هاي، الزمي وبوسي واطلبي انو يعتذرلج وهو لازم يعتذر واحضني،، والشغلة الي رادها راح تنطينها اله بس بمزاجج انتي.
🐯_ اذا جان طفلج وكح جدا لو يعاندج او يضرب اخوانه او خواته لو يكسر شغلات بالبيت،
🐯_ جربي كرسي المشاغبين لمن تفقدين السيطرة :
هو كرسي أو مكان مابي اي نوع من الترفيه ممكن يكون مكان في غرفة الكعدة.
⛔ تطلبين منه يكعد لمدة خمس دقائق لمن يسوي اي تصرف يضايقج (احرصي دائما على وجوده في الغرفة نفسها اللي انتي موجودة بيها ولا تخلينه بغير غرفة أبدا ).
⛔ واذا كام قبل المدة، لازم ترجعينه وتعيدين المدة من جديد واذا شفتي الشغلة مافارقة ويا ، زيدي المدة اكثر.
🐯اغلب الأطفال يستجيبوا لوالديهم خلال المده هاي . ولما تخلص المده صيحي وكوليلة عاقبتي ليش؟ واطلبي منه يعتذرلج وبوسي واحضني.
🐯هددي اذا ماكعد راحة انو ماتنطينه فلوس او ماتخلينه يلزم الموبايل او يباوع افلام كارتون او يلعب ويا اطفال الجيران، واذا ماستجاب نفذي تهديدج وتجاهلي مهما كان ونفذي عقابج، وهالشي لمصلحته ف تحملي مشاعرج.
🎇 نظام العقاب الذكي : انو تعرضي لطفلج ثلث عقوبات وهو يختار طبعا حسب الغلطة، مثلا ماتنطينه فلوس لمدة يومين او ماتخلينه يطلع برا او مايلعب بالموبايل او... وهو يختار وحدة منهن وطبعا تنفذينها بجدية، وهالشي يخلي الطفل يفكر مليون مرة قبل الغلط، ويضل الصراع بينه وبين نفسه مو بينج وبينه.
#احمدالعماد
